Հարգելի՛ բարեկամներ,

  Բարի գալուստ «Փոքրիկ Իշխան» կրթահամալիրի պաշտոնական կայք։

Այս հարթակը նախատեսված է կրթահամալիրի ողջ կրթական համայնքի, ինչպես նաև բոլոր նրանց համար, ովքեր ուզում են միանալ մեր մեծ ու համերաշխ ընտանիքին։ Այստեղ դուք կարող եք գտնել մեր դպրոցի առօրյային, գործունեությանը, ծրագրերին, նախագծերին, նորություններին և միջոցառումներին  վերաբերող տեղեկատվություն։

Ժամանակակից աշխարհում ամենազորեղ զենքը գիտելիքն է:  Դա այն ուժն է, որն անպարտելի է դարձնում մարդուն , որն ունակ է բազում դռներ բանալու, տանելու ճիշտ ու արդար ուղիով: Իսկ գիտելիքի ձեռք բերման համար անհրաժեշտ են ոչ միայն ցանկություն, խելք ու կամք, այլ նաև բազմակողմանի, փոխկապակցված, նպատակասլաց  աշխատանք և նպաստավոր պայմաններ, որոնք էլ ստեղծվում են դպրոց-ընտանիք սերտ համագործակցության արդյունքում:

   «Փոքրիկ Իշխան» կրթահամալիրի գործունեությունը նպատակաուղղված է  աշակերտի բազմակողմանի ու մատչելի ուսումնառության կազմակերպմանը, ներդաշնակ միջավայր ստեղծելուն, որտեղ աշակերտն ունի ազատ արտահայտվելու իրավունք,  ստեղծագործական կարողություններ ձևավորելու, վերլուծական  միտք զարգացնելու հնարավորություն։   Շնորհիվ մեր կրթահամալիրի հմուտ և արհեստավարժ ուսուցիչների՝  ամեն սովորող  կարողանում է գտնել իրեն հուզող հարցերի պատասխանները,  ունենալ նորօրյա աշխարհընկալում և վերաբերմունք։

  Փաստում եմ, որ իր գործունեության 20 և ավելի տարիների ընթացքում կրթահամալիրը իր կարևոր, լուրջ ու արժեքավոր խոսքն է ասել կրթության ոլորտում՝ աչքի ընկնելով բազմաթիվ ձեռքբերումներով, նախագծերով, ծրագրերով՝ նոր կյանք ուղղորդելով կրթված ու բանիմաց սերունդների։

  Կրթահամալիրում տեսական գիտելիքից, գործնական հմտություններից ու կարողություններից զատ կարևորվում է նաև քաղաքացիական ինքնագիտակցության, ակտիվ առաջնորդության և ազատ մտածողության  հիմնարար  արժեքների զարգացումը: 

  Մեր հաջողված գործունեության  ամենամեծ վկայությունը  մեր բանիմաց շրջանավարտներն են, որոնք  ընդունվում են բուհ հենց դպրոցում ստացած ակադեմիական գիտելիքներով։ Անհերքելի է, որ ցանկացած շրջանավարտ պետք է կարողանա հստակ  ու կողմնորոշված մտնել ժամանակակից հասարակություն ու հարմարվել զարգացման արագ տեմպերին և իրարամերժ միտումներին: Դա պահանջում է ոչ միայն տեղեկացվածություն, գիտելիքների առկայություն, այլ գիտելիքների մեջ ինքնուրույն կողմնորոշվելու, որոշումներ կայացնելու կարողություն և պատասխանատվություն:

     Հարգանքով՝ «Փոքրիկ Իշխան» կրթահամալիրի տնօրեն Մարիա Արմենակի Խախամյան