«Մի՛ մոռացիր, որ հավիտյան պատասխանատու ես նրա համար, ում ընտելացրել ես»
— Անտուան դը Սենտ-Էքզյուպերի

​

«Փոքրիկ իշխան» կրթահամալիրը հիմնադրվել է 2000 թվականին ֆիզիկամաթեմատիկական գիտությունների դոկտոր, դոցենտ Անահիտ Գեղամի Սարգսյանի նախաձեռնությամբ։ Նվիրյալ գիտնականը, հայրենասեր ու հմուտ մանկավարժը, կարևորելով կրթական ոլորտի բարեփոխումների անհրաժեշտությունը, կյանքի կոչեց իր տեսլականը՝ հիմնելով ժամանակակից կրթօջախ։

Կրթահամալիրի տեսլականն է ունենալ բազմակողմանի զարգացած, քննադատական մտածողությամբ օժտված, համամարդկային արժեքներով դաստիարակված և հայրենասիրության ոգով տոգորված սերունդ։ Կրթահամալիրում կրթությունը միտված է այնպիսի անձի ձևավորմանը, ով գիտակցում է իր իրավունքներն ու պարտականությունները, կրում է բարձր արժեքային համակարգ և պատրաստ է դառնալ հասարակության ակտիվ անդամ։

 

Հիմնադրման պահին կրթահամալիրը ունեցել է ընդամենը 12 աշակերտ, այսօր այստեղ կրթություն են ստանում  շուրջ 450 սովորող:

Այն իրականացնում է լիցենզավորված գործունեություն/Լիցենզիա թիվ 1108,0049,0834,1020/ հանրակրթության և նախադպրոցական կրթության ոլորտներում:

Կրթահամալիրում ուսուցումը քառաստիճան է՝ նախակրթարան, տարրական, միջին և ավագ դպրոցներ։ Շրջանավարտները ստանում են միջնակարգ կրթության պետական նմուշի ատեստատ։

«Փոքրիկ իշխան»-ի հաջողության գրավականը նաև  փորձառու և նվիրված մանկավարժներն են, այդ թվում՝ գիտական կոչում ունեցող մասնագետներ։

Մեր շրջանավարտները, ստանալով որակյալ կրթություն, հաջողությամբ ընդունվում են ոչ միայն Հայաստանի առաջատար բուհեր, այլև միջազգային հեղինակավոր համալսարաններ՝ դառնալով մրցունակ մասնագետներ։

Փոքրիկ Իշխան» կրթահամալիրը մեր սերնդի համար ջերմ ու բազմաբնույթ առօրյայով մի օջախ է, որտեղ նրանք ոտք են դնում մանկության ոսկե հեքիաթով ու ավարտում այն աշխարհի, սեփական անձի առանձնահատկությունների և ազգային ինքնության ուրույն և վստահ ընկալմամբ:​